香港新浪網 MySinaBlog
« 上一篇 | 下一篇 »
Beryl | 10-Apr-15 | 一些 | (75 Reads)

最近

重讀我這個blog,讀到寫你的劇你的夢想的文章,剛才收到你大哥在fb的通知,我只想講︰「朋友,對唔住。」

我睇到你post寄生獸,我like左,你留左手提同代號,我唔明,今日睇番,是手機密碼吧,我成日都想問你有冇劇上,我好想再去睇你,我以前都有間中寫email問你,今時今日通訊更容易,我反易冇搵你,對唔住!

你fb的相,張張都好唔靚仔,仲要係你失眠時影的,我見親都好唔開心,有私信叫你影過,你答應左但冇做過,我冇追你,對唔住!

要你大哥在fb通知我們,謝謝你的家人,天家再會你,沒有你在的安息禮拜,我沒有去。你大哥說是意外在家跌倒過身,我就信是意外。我不會告訴我家姐你意外過身了,她現在還記得你,但我不會告訴她,免得多一個人為你傷心。意外,是意外,意外不會傳染,意外不會物傷其類。

謝謝你當年幫我洗禮影的相,你唔單止主動幫我影,仲自動自覺晒比我,好多謝你!雖然你好介意我領洗那幾張out focus,但係我好鍾意好珍貴,我到而家都好感謝你!

記得你的憤世嫉俗,

記得你的笑,

記得你的俊,記得你像白淨版的周潤發,記得你在我眼中比周潤發更靚仔,

記得你穿西裝的話劇,

記得你和N一齊被推薦考上當年還未是神學院的崇基,記得你暗戀N,記得你讀崇基後不久就冇再返教會,我就冇點見過你,記得你前排話過你想返去但唔知點樣好,我有留言回應比你,叫你唔使諗咁多返去就返去,你好快就刪了成組野。

記得我話中大學生做咩冇筆你話大學生就要帶筆咩,怒怒地說了一車話,

記得最樸素最文青年代的我在火車遇到你,我收起手上的明報副刊,叫你過來,下火車後一同走到你家樓下。

記得我們的中學時代,我一直記錯曾與你同班,你一直記錯我的英文名。

記得我們的教會生活,那年代的歡笑與未來。

記得你,記得你,

永遠想念你,

一路好走,天家再遇你,賴建發。

賴建發,現在我好憎你,你做咩要死?你做咩要意外在家死?

賴建發,我好鍾意你,我一直都好鍾意你,因為你是我最自豪的中學同學,你是我認為最有夢想的人,我一直都好想話比你知,你每個女朋友都好靚,我一直都冇話比你知,我好像小fans咁鍾意你呢個偶像。

我好鍾意你編的話劇,我好鍾意你寫的野,我好鍾意睇你做話劇,我好鍾意坐在你為我安排的第一行睇你做話劇。好鍾意你唸台詞「Blythe」時的語氣,我幾乎將自己的名字改做Blythe,因為你一直叫我Pearl唔叫我Beryl,只有你一直叫我做Pearl。

我好鍾意你,賴建發,你一直都是我心目中的明星。

天家再會你。

Picture

將你的廣告放上youtube,比你自己仲快,記得話比你知的時候,你比我仲訝異我竟然搵得到片源。

因為你寫夢想︰

http://puiyee412.mysinablog.com/index.php?op=ViewArticle&articleId=1511394

寫你的劇「美國蝦」︰ 

http://puiyee412.mysinablog.com/index.php?op=ViewArticle&articleId=603935

寫你的演出,想做Blythe︰

http://puiyee412.mysinablog.com/index.php?op=ViewArticle&articleId=603903

我寫你的7A劇場︰ 

http://puiyee412.mysinablog.com/index.php?op=ViewArticle&articleId=603866

你將你的演出放了上youtube,我記得我話過比你知,你演的那個警察好係真實的你,我記得的你,那樣靚仔那樣自負那樣寸寸貢,你話你老了唔靚仔唔自負唔再寸寸貢。

https://www.youtube.com/channel/UCnw0MFEx4aDz9QytPhJI2tw

 

我想念你,賴建發,

想念你,

我好鍾意你。